Der Goalie bin ig: Roman

Von Pedro Lenz

Der erste Roman von Pedro Lenz! In 'Der Goalie bin ig' hält ein Ich-Erzähler Rück-schau auf ein verlorenes Paradies. Der 'Goalie', ein Süchtiger aus einem Dorf im Mittelland, erzählt in Umgangssprache von seiner Lebenswelt in den 80er-Jahren. Seine Sicht auf die Umgebung ist getrübt vom Wunsch, sein bisheriges Leben schönzureden. Nach einer Gefängnisstrafe versucht er wieder im Alltag Fuss zu fassen, findet eine Gelegenheitsarbeit, verliebt sich in eine Serviererin und reist mit der Ange-beteten nach Spanien – und trotzdem holen ihn die alten Geschichten immer wieder ein. Lenz gelingt ein berührendes Porträt des 'Goalies' und einer kleinen, uns wenig bekannten Welt mitten in der Schweiz. Doch da die grosse Welt aus lauter kleinen Räumen besteht, haben wir es hier zweifellos mit Weltliteratur zu tun.

• Sprache: Deutsch
• Herausgeber: Der gesunde Menschenversand
• Erscheinungsdatum: 2. Apr. 2010
• ISBN: 9783905825688

Buchvorschau

1.

Aagfange hets eigetlech vüu früecher. Aber i chönnt jetz ou grad so guet behoupte, es heig a däm einten Oben aagfange, es paar Tag nachdäm, dasi vo Witz bi zrügg cho.

Vilecht isches öppe zähni gsi, vilecht e haub Stung spöter. Spüut ke Roue. Uf au Fäu hets Bise gha wi d Sou. Schummertau. Novämber. Und ig es Härz so schwär, wi nen aute, nasse Bodelumpe.

Goni auso i ds Maison, es Fertig go näh.

Ds Abschiedsgäud vor Chischte hani scho vertublet gha, ohni genau z wüsse wie. Ig ke Chole, aber unbedingt es Kafi Fertig und chli Gsöuschaft und chli Stimme bbrucht, denn.

I säges jo, nüt im Sack aus es paar Sigeretten und chli öppis i Münz. En Ängpass äbe, aber e ziemlech e böse. Ha drum uf öppis gwartet, woni z guet hätt gha. Nume, säg das mou öpperem, wennde grad usem Loch bisch cho, säg mou öpperem, du heigsch zwar ziemlech vüu Gäud z guet, sigsch aber grad nid bsungers flüssig. Das interessiert jetz gar niemer.

Auso, wi gseit, ig i ds Maison, es Kafi Fertig bschtöut, frogtmi d Regula, obis chöng zahle.

Ke schlächti Frog, wemen überleit. Bissoguet tue nid liire Regi! Weisch was, jetz bringsches afe mou, machen i zuenere, nächär luegemer de.

Bisch en ewige Stürmi, seit si und bringtmers.

Has nid tippet, macht si när und luegt mi so aa, weiss ou nid wie, angers aus süsch, mit chli meh Sehnsucht i den Ougen oder öppis. Ke Ahnig wies angerne geit, aber mi wärmt das grad bis z innerscht inne, wemi e Frou wi d Regi eso aaluegt.

Merci Regi, bisch e Liebi. Zahleders de mou mit bätte zrügg.

Söu doch bitte ufhöre mit minen ewige Sprüch. Und söu mi vor auem nid dra gwöhne, seit si, wöu, wenn der Pesche erfahri, dass si das Fertig nid tippet heig, de gäbs de extremi Lämpe. I wüss jo säuber, wie der Pesche mängisch chöng tue.

Dasch e Gueti, d Regula, die chame rüehme, die luegt zuenis, seitsech eifach, das tippeni jetz mou nid und das merkt jo wahrschinlech kenen und der Wirt, der Pesche, dä merkts sowieso zletscht und der Goalie het sis Kafi Fertig und schluss.

Mir isch jo das scho lang bewusst gsi, dass d Regula es grosses Härz het. Aber a däm Obe het si mer ou süsch afoh gfaue.

Dasch im Grund gnoh extrem komisch. De kennsch e Frou sit Johren und überleischder gar nid so vüu und plötzlech, nondediö, plötzlech het si öppis. Mou, plötzlech het si öppis, wo di närvös macht, plötzlech gfaut si der. Do söu no nochecho wär wott. I ha vüu offeni Froge gha, a däm Obe, ehrlech. Aber uf ds Mou hetmi nume no ei Frog würklech interessiert: Isches ächt möglech, dass d Regula und ig i däm Läben einisch es Paar wärde?

Du, Regula, hani gmacht, chönntsch mer ächt nid e chliine Gfaue mache? Chönntisch nid bis am Mändig e Grüeni entbehre? Weisch, ha drum no ziemlech vüu z guet, aber gägewärtig fasch gar nüt im Sack, es Problem ir imaginäre Erfougsrächnig, wenn d weisch wieni meine.

Si luegt mi wieder aa. I heig mi offebar nid veränderet, z Witzwiu, seit si no, und dasme nid würd meine, dasi fasch es Johr dihinge sig gsi, wöu, we me mir eso zuelosi, de sigi no ganz genau der gliich Plouderi wie vorhär.

Stürm doch nid scho wieder, Regi. Du hesch ke Ahnig vo däm. Du weisch nüt vo mir und du weisch nüt vo Witzwiu. Aber das isch äuä besser eso. Chasch froh si. Und wägem Chümi: I wott di würklech nid aabättle, ehrlech nid, du entscheidisch, auso entweder heschmer dä Füffzger oder du heschmerne nid, und de frogeni öpper angers. Dasch aus.

Si hetmernen ömu de gha, hetmerne zämegleit i d Hemmlitäsche gschobe, ohni Kommentar. I hanere d Hang gnoh und hasen uf d Innesite vom Arm küsst, und hanere gseit, we de nid müesstisch bügle, würdi di jetz grad hei näh und verruume. I schwöre ders, Regi, i miech di glücklech.

I sig e blöde Lafericheib, het si zuemer gmacht und chli glachet und ig ha ou glachet. Het guet to, wieder einisch z lache, würklech guet. Ha drum nid eso vüu z lache gha ir Letschti, ehrlech nid.

Woni ds Fertig fertig ha gha, bini ggange, überen i Spanierklub, go luegen öbs no öppis z Ässe gäb. Es het tatsächlech no öppis ggäh, obwouh dases scho spät isch gsi. Der Paco hetmer chli Fisch gmacht und chli Ris gwärmt. Guet eso.

Woni so lang sig gsi, heter wöue wüsse. Är heig mi jo en Ewigkeit nümm gseh.

Galera, hani gmacht, weisch, Alcatraz, und ha mit de Finger vor den Ougen es Chrüz aaddütet, eso, dases usgseh het wienes Gitter.

Är het nume si schwär Chopf gschüttlet und chli ds Mu verzoge. Dört düre si die no guet, do im Spanierklub, di wüsse, wenn nochefroge und wenn grad ender nid.

Du Paco, säg mou, hesch du öppe der Ueli nöime gseh oder d Marta? Nid? Si si nid verbicho? Macht ou nüt. Isch übrigens guet der Ris, tipptopp, mou, Cheibe chochet guet, würklech.

Gracias Quiper, heter gseit. Quiper chunnt vo Keeper und heisst ds Gliiche wi Goalie, aber so wimes uf Spanisch seit. Merci, är wärds gärn usrichten ir Chuchi, heter gmacht und derzue hetermer chli Rote nochegschänkt mit sire grosse, ruhige Hang, womi denn grad a d Hang vo mim Vatter erinneret het, wo zwar nid der Eifachscht isch gsi, aber mängisch ou so ne ruhigi Hang het gha. Ig auso Rote vo Navarra im Glas, vom guete. Obwouh, weni denn grad hätt chönnen useläse, hätti fasch lieber es haubs Löffeli Schugr gha. Und gliichzitig hani gwüsst, dass das jetz mues höre, dasi ändgüutig e Strich mues drunger zieh, unger das elände Gift und das ganze Glump. Es isch doch logisch, chasch jo nid ds ganze Läbe lang däm Kick nocheseckle, ds ganze Läbe lang nume warte, bis es wieder Spläsch macht im Gring oben und der d Wärmi sogar no zmitts im Winter wi ne heisse Summerwind dür d Vene bloset.

De hesch auso der Ueli nüt gseh? Weisch, i suechene drum, muesnen öppis Wichtigs froge.

Nei, seit der Paco, nei, är heigne scho lang nümm gseh, sicher meh aus e Wuche. Armen Ueli. Heig sicher Problem.

Der Ueli isch es Pajass, Tschuudigung. Aber das hani am Paco nid gseit, dasch e Sach zwüsche mir und mir, das muesi niemerem säge, nid emou am Ueli säuber. Es regt mi eifach uf, dassde mit däm blöde Gigu nie öppis verbindlech chasch abmache. Nie, nie!

Guet, är hetmer di Wohnig gmischlet, das mues ou mou gseit si, mini Loge hani dank ihm, wöu si Vatter Beziehige het zu dere Verwautig oder was weiss ig zu wäm.

Aber sorry, es isch jo nid sini Hütte, i zahle der Zins, i meine, merci, merci Ueli, dankedanke, merci tusigmou, aber das het nüt mit üsem Business z tüe. D Wohnig isch d Wohnig und ds Business isch ds Business. Und wennden amne Kolleg versprichsch, du heigschim denn und denn der Chole, wo d nim schwach bisch, de heschnen ou denn und denn oder süsch seisch öppis oder lütisch aa, schribsch es paar Zile, losch öppis lo usrichte, weiss doch ou nid, irgendöppis, aber verschwindisch doch nid eifach vor Büudflächi.

I ha uf d Uhr gluegt, wo obe, näbe däm vergüubte Real-Madrid-Wimpu isch ghanget, a däm Bauke, wo ou d Neonröhren aagmacht si. Haubi zwöufi gsi. No ne Veterano und när hei, hani ddänkt. Nume hetsmi nid aagmacht, bi däm Dräckwätter use z goh. Gimer e Brandy, Paco, aber guet iigschänkt, bissoguet, es isch wieder chaut verusse.

Isch irgendwie komisch gsi, dases im Spanier nid meh Lüt het gha, i meine, he, es isch e Fritig gsi. Es paar Jungi am Töggelen und es paar Auti am Schnore, dasch aus gsi. Und ig dörten am Warten uf weiss säuber nid was.

He Aute, mach öppis, du muesch öppis mache!, hani zu mir säuber gseit, und no mou e Brandy bschtöut. Guet hetmer d Regula dä Füffzger ggäh gha. Me isch eifach en angere Mönsch, weme chli öppis im Portemonnaie het. Aber weni der Ueli nid gli finge, hani ddänkt, mues si äuä no chli Geduud ha, d Regula, bis si öppis zrügg überchunnt.

Woni ar Regula umeschtudiert ha, hani ds Ougewasser übercho. Weiss säuber nid worum, es isch extrem piinlech, alei amne Tisch z hocken und z merke, dass der eifach Tränen abeloufe.

Du Goalie, mir wette Fürobe mache!

Dasch am Paco sini Frou gsi. Wenns drufa chunnt, isches gäng si, wo mues luege. Der Paco isch z weich, dä cha nid Fürobe mache, dä bringtnis nid use. Aber si scho.

Ig auso chli d Ouge gribe, dases usgseht, wie weni en Entzündig hätt, zauht und ggangen und gäge hei zue. Aber nid der diräktischt Wäg gnoh, nei, no gschwing wöue bim Maison düreloufe, luege, ob vilecht d Regula ou grad Fürobe macht. Drum hani dört im Höfli no eini groukt, mit Ussicht uf die hingeri Türe, wöu i ddänkt ha, si chömm de dörten use. Liecht hets ömu no gha, ir Beiz. Wär schön, se no churz z gseh, hani ddänkt. Bi am Schärme gschtange, im Dunkle. Me hetmi vor Stross us nid gseh und vom Parkplatz us ou nid, zum Glück. Der Budi het drum ou ufse gwartet. Aber der Budi isch im Chare ghocket, der Budi isch ihre Typ gsi, der Budi isch offiziell gsi. Der Budi het d Regula vom Schaffen abghout, wöu er e Funktion het gha, wöu me das so macht, wemen e Fründin het, wo im Service schaffet und me sicher wott si, dass si hei chunnt. Vor auem wenn si im Maison schaffet, wo zum Bispüu söttigi Bandite wien ig verchehren und no schlimmeri.

Gratuliere Budi, hesch auso aues unger Kontroue, kontrolliersch di Chare, kontrolliersch dini Fründin, kontrolliersch dini Frisur, kontrolliersch di Bluetdruck, bisch der Chef, Budi, hundertpro, du bisch der Champion, Budi, dir ghört si, du heschs im Griff, hesch si im Griff, bravo, bravo, bravo Budi, du Brätzelibueb, hani ddänkt und afe mou a Bode gchoderet.

I ha denn und dörte nüt gha, ke Aaspruch, ke Chance, ke Chole, ke gar nüt. Hätt nume zuefäuig wöue düreloufe, wenn si usechunnt und zuere säge: He lueg jetz, d Regula! Hesch ou grad hei wöue? Wo muesch häre, Regi? Los mou, i begleite di. Nei, äuä, es isch würklech ke grossen Umwäg, stöu der vor, nei chum jetz, ehrlech nid, es macht mer nüt us. Ha sowieso dört düre wöue.

Und ufem Wäg hätti chli myschteriös gschwige. Das chunnt meischtens guet aa. Grad wenn eini der ganz Tag serviert het, de muescheren am haubieis nid no meh d Bire füue. De muesch afe mou chönne schwige, eifach schwige, zuelose, wenn si öppis verzöut und wenn si nüt verzöut äbefaus. Und nächär, spöter, vor ihrere Wohnig, chli häben und drü Müntschi uf d Backe, aber bim letschte dervo, e haubi Sekunde länger druffe blibe mit de Lippe, eifach es bitzeli länger aus normau wär. Und de furt. Und de no mou umdräien und ganz churz winke.

So hättis gmacht, so dass si hätt chönne dänke, dasch eigetlech no ne subere Cheib, dä Goalie. Siech isch zwar grad es Johr lang dihinge gsi, het zwar ke Chümi im Sack, aber derfür heter chli Stiiu. Und wieso heter vori bim Abschiedskuss zögeret? Mi hets doch fasch ddünkt, är heig churz zögeret bim letschte Kuss. Fasch wi wener no länger hätt wöue küsse. Oder hanis ächt nume gmeint?

Genau söttigi Gedanke söttisch einere wi der Regula mit ufe Wäg gä. Das wäre Gedanke, wo si no nes Zytli chönnt Fröid ha dranne.

Das aues hanimer überleit gha. Und voren im Schatten isch der Budi i sim ufegschrüblete Celica ghocket und het d Aalag ziemlech ufddräit gha und d Heizig sehr wahrschinlech ou. Nume grad ig ha a däm blöde, zügigen Eggen a Ranze gfrore wie nes chranks Chaub im Winter, für nüt und ohni Musig.

He Goalie, was isch los? Was machsch jetz no do? Wartisch ufne Lüngenentzündig?, hani zuemer säuber gseit und bi hei, z Fuess und aleini, wi immer.